ئۇيغۇرچە ژۇرنالغا دائىر چوڭ ئىشلار خاتىرىسى

   يوللىغۇچى: باشقۇرغۇچى    كۆرۈلۈشى: 1765   يوللانغان ۋاقتى: 2013-08-02 13:00:17

  
   ئۇيغۇرچە ژۇرنالغا دائىر چوڭ ئىشلار خاتىرىسى


  ★ 1988 - يىلى 10 – ئايدا  «مىللەتلەر ئىتتىپاقى» ژۇرنىلىنىڭ ئۇيغۇرچە، قازاقچە تۇنجى نۇسخىسى بېيجىڭدا نەشر قىلىندى ۋە تارقىتىلدى.
  ★ 1988 - يىلى 5 - ئايدا  مەملىكەتلىك سىياسىي كېڭەشنىڭ مۇئاۋىن رەئىسى، دۆلەتلىك مىللەتلەر ئىشلىرى كومىتېتىنىڭ مۇدىرى  ئىسمائىل ئەھمەد: « ‹مىللەتلەر ئىتتىپاقى› ژۇرنىلىنىڭ ئۇيغۇرچە نەشر قىلىنغانلىقىنى تەبرىكلەيمەن. ئىسلاھات روھى بىلەن ژۇرنالنى ياخشى باشقۇرۇپ، مىللەتلەرنىڭ باراۋەرلىكى، ئىتتىپاقلىقى، ئورتاق گۈللىنىشى، ئىلىگىرىلىشىنى تەشۋىق قىلىپ، شىنجاڭ ئۇيغۇر ئاپتونوم رايونىدىكى ھەر مىللەت خەلقىنى تېخىمۇ كۆپ، يېڭى ئۇچۇر بىلەن تەمىنلەپ، ئۇيغۇر ئوقۇرمەنلەرنىڭ ساداسىغا ئايلىنىشىنى ئۈمىد قىلىمەن» دەپ بېغىشلىما يېزىپ بەردى.
   ★ 1988 - يىلى 10 - ئايدا   مەملىكەتلىك سىياسىي كېڭەشنىڭ مۇئاۋىن رەئىسى، دۆلەتلىك مىللەتلەر ئىشلىرى كومىتېتىنىڭ مۇدىرى  ئىسمائىل ئەھمەد «مىللەتلەر ئىتتىپاقى» ژۇرنىلىنىڭ قازاقچە نەشر قىلىنغانلىقىنى تەبرىكلەپ، بېغىشلىما يېزىپ بەردى.
  ★ 1989 - يىلى  1- ئايدا  «مىللەتلەر ئىتتىپاقى» ژۇرنىلى قازاقچە نۇسخىسىنىڭ تارقىتىش مۇراسىمى بېيجىڭ ۋە ئۈرۈمچىدە ئۆتكۈزۈلدى.  ژۇرنالنىڭ قازاقچە نۇسخىسىنىڭ يېڭىدىن دۇنياغا كەلگەنلىكى ھەرقايسى تارقىتىش ۋاسىتىلىرىدا خەۋەر قىلىندى. ھەتتا قازاقىستاندا چىقىدىغان «سوتسىيالىستىك قازاقىستان» ژۇرنىلىدا مۇقاۋا سۈرىتى ئېلان قىلىندى.
  ★  1991- يىلى 1 - ئاينىڭ  8- كۈنى دۆلەتلىك مىللەتلەر ئىشلىرى كومىتېتى پارتگۇرۇپپىسى قارار چىقىرىپ، ئىدرىس باراتنى مىللەتلەر ئىتتىپاقى ژۇرناللىرى نەشرىياتىنىڭ مۇئاۋىن باش مۇھەررىرى، ئۇيغۇرچە «مىللەتلەر ئىتتىپاقى» ژۇرنىلىنىڭ باش مۇھەررىرلىكىگە تەيىنلىدى.
  ★1991- يىلى 6 - ئايدا دۆلەتلىك مىللەتلەر ئىشلىرى كومىتېتى پارتگۇرۇپپىسى 94- نومۇرلۇق قارار چىقىرىپ، «مىللەتلەر ئىتتىپاقى ژۇرناللىرى نەشرىياتى شىنجاڭ شۆبىسى»نى قۇرۇش، قارىمىقىدا ئۇيغۇر تەھرىر - تەرجىمە ئىشخانىسى، قازاق تەھرىر – تەرجىمە ئىشخانىسى تەسىس قىلىش، ئىدرىس بارات قوشۇمچە شۆبە ئىدارىنىڭ مۇدىرىلىقىنى ئۆتەشنى بېكىتتى. شۇنىڭدىن باشلاپ ئۇيغۇرچە، قازاقچە ژۇرنال ئۈرۈمچىدە نەشر قىلىنىپ تارقىتىلىشقا باشلىدى.
  ★ 1991 - يىلى «مىللەتلەر ئىتتىپاقى»نىڭ ئۇيغۇرچە نۇسخىسى تارقىتىش تىراژى جەھەتتە 10 مىڭلىق ئۆتكەلنى بۆسۈپ، 18 مىڭ نۇسخا بېسىلىپ، ھەرقايسى يېزىقلاردىكى ژۇرناللار ئىچىدە ئەڭ ئالدىدا تۇردى.
   ★ 1994 - يىل 10 - ئاي شىنجاڭ ئۇيغۇر ئاپتونوم رايونى قۇرۇلغانلىقىنىڭ 40 يىللىقىنى تەبرىكلەش مۇناسىۋىتى بىلەن، مىللەتلەر ئىتتىپاقى ژۇرناللىرى نەشرىياتىنىڭ مۇئاۋىن باش مۇھەررىرى، ئۇيغۇرچە ژۇرنالنىڭ باش مۇھەررىرى ئىدرىس بارات شىنجاڭ ئۇيغۇر ئاپتونوم رايونىنىڭ رەئىسى ئابلەت ئابدۇرېشىتنى زىيارەت قىلىپ، ماقالە يازدى.    
  ★  1994- يىلى10 - ئايدا مىللەتلەر ئىتتىپاقى ژۇرناللىرى نەشرىياتى  ژۇرنال نامىنى «جۇڭگو مىللەتلىرى» ئۆزگەرتىش توغرىسىدىكى تۇنجى دوكلاتىنى دۆلەتلىك مىللەتلەر ئىشلىرى كومىتېتىغا يوللىدى.
  ★ 1995 - يىلى 6- ئايدا مىللەتلەر ئىتتىپاقى ژۇرناللىرى نەشرىياتى شىنجاڭ شۆبە پارتىيە ياچېكىسى دۆلەتلىك مىللەتلەر ئىشلىرى كومىتېتىغا بىۋاسىتە قاراشلىق ئىدارە - ئورگانلار پارتكومى تەرىپىدىن « 1993ـــــ 1994-يىللىق ئىلغار ئاساسىي قاتلام پارتىيە تەشكىلاتى» بولۇپ تەقدىرلەندى. دۆلەتلىك مىللەتلەر ئىشلىرى كومىتېتىغا بىۋاسىتە قاراشلىق ئىدارە- ئورگانلار پارتكومى شىنجاڭ شۆبە ئىدارە پارتىيە ياچېكا شۇجىسى ئىدرىس باراتنىڭ ئىلغار ئىش – ئىزلىرىنى بېسىپ تارقاتتى. 
  ★ 1996 - يىلى 6 - ئايدا  مىللەتلەر ئىتتىپاقى ژۇرناللىرى نەشرىياتىنىڭ مۇئاۋىن باش مۇھەررىرى، شىنجاڭ شۆبە ئىدارسىنىڭ مۇدىرى، پارتىيە ياچېكىسىنىڭ شۇجىسى ئىدرىس بارات دۆلەتلىك مىللەتلەر ئىشلىرى كومىتېتىغا بىۋاسىتە قاراشلىق ئىدارە - ئورگانلار پارتكومى تەرىپىدىن « مۇنەۋۋەر پارتىيە خىزمەتچىسى» بولۇپ تەقدىرلەندى.
  ★ 1996 - يىلى 10 - ئايدا مىللەتلەر ئىتتىپاقى ژۇرناللىرى نەشرىياتى شىنجاڭ شۆبە ئىدارىسى ئۈرۈمچى شەھەرلىك پوچتا ئىدارىسى تەرىپىدىن «10 مۇنەۋۋەر گېزىت - ژۇرنال ئىدارىسى»نىڭ بىرى شەرىپىگە ئېرىشتى.
  ★ 1997 - يىلى ئۇيغۇرچە ژۇرنال تارقىتىىش جەھەتتە رېكورت يارىتىپ، 88 مىڭ نۇسخا تارقىتىلىپ، مەملىكەت بويىچە ئاز سانلىق مىللەتلەر تىل - يېزىقىدىكى قوش ئايلىق ژۇرناللار ئىچىدە ئالدىنقى قاتاردا تۇردى. ئىدرىس باراتنىڭ ئىش - ئىزلىرى  شىنجاڭ «ياچېكا تۇرمۇشى » ژۇرنىلىدا تونۇشتۇرۇلدى، ژۇرنال مۇقاۋىسىغا سۈرىتى بېسىلدى.
  ★ 1997 - يىلى 5 - ئايدا خەنزۇچە «مىللەتلەر ئىتتىپاقى» ژۇرنىلى نەشر قىلىنغانلىقىنىڭ 40 يىللىقىنى، ئۇيغۇرچە، قازاقچە ژۇرنال نەشر قىلىنغانلىقىنىڭ 10 يىللىقىنى تەبرىكلەش مۇناسىۋىتى بىلەن، شىنجاڭ شۆبە ئىدارىمىز «جەزبدار گۈلدەستىلەر» ناملىق تاللانغان ماقالە - ئەسەرلەر توپلىمىنى تەييارلاپ نەشر قىلدۇردى. دۆلەت ئىشلىرى كومىسسارى،  دۆلەتلىك مىللەتلەر ئىشلىرى كومىتېتىنىڭ مۇدىرى ئىسمائىل ئەھمەد كىتابقا بېغىشلىما يېزىپ بەردى.
  ★ 1997 - يىل 9 - ئاينىڭ 18 - كۈنى  مەملىكەتلىك خەلق قۇرۇلتىيى دائىمىي كومىتېتىنىڭ مۇئاۋىن باشلىقى سەيپىدىن ئەزىزى خەنزۇچە «مىللەتلەر ئىتتىپاقى» ژۇرنىلى نەشر قىلىنغانلىقىنىڭ 40 يىللىقىغا ئاتاپ بېغىشلىما يېزىپ بەردى.
  ★ 1997 - يىل 10- ئاينىڭ 30 – كۈنى دۆلەتلىك مىللەتلەر ئىشلىرى كومىتېتى 87 - نومۇرلۇق قارار چىقىرىپ، مىللەتلەر ئىتتىپاقى ژۇرناللىرى نەشرىياتىدا پارتكوم قۇرۇشنى قارار قىلدى، ئىدرىس بارات پارتكومنىڭ مۇئاۋىن شۇجىسى، قوشۇمچە ئىنتىزام تەكشۈرۈش شۇجىسى بولدى.
  ★1997- يىلى 10- ئايدا «مىللەتلەر ئىتتىپاقى» ژۇرنىلى خەنزۇچە نۇسخىسى نەشر قىلىنغانلىقىنىڭ 40 يىللىقىنى، موڭغۇلچە نۇسخىسىنىڭ 10 يىلىلىقىنى  خاتىرىلەش - تەبرىكلەش مۇراسىمى «خەلق» سارىيىدا ئۆتكۈزۈلدى. بۇخ، تۆمۈر داۋامەت، ئىسمائىل ئەھمەد، ئاپېي ئاۋاڭجىنمېي، سەيپىدىن ئەزىزى قاتارلىق دۆلەت رەھبەرلىرى قاتناشتى.
  ★ 1997 - يىلى 11 - ئاي  نەشرىياتنىڭ مۇئاۋىن باش مۇھەررىرى ئىدرىس بارات، قازاق تەھرىر بۆلۈمى مۇدىرى ساغات  بازارقان شىنجاڭدىن 22 نەپەر ئاز سانلىق مىللەت يازغۇچى – شائىر ئەدىبنى ئىچكىرى ئۆلكىلەرنى زىيارەت قىلىش - ئۆگنىشكە  تەشكىللەپ، خەنزۇچە ژۇرنال نەشر قىلىنىغانلىقىنىڭ 40 يىللىقىنى تەبرىكلەش پائالىيەتلىرىگە قاتناشتى. بۇ ئۆمەك ئەزالىرى «خەلق سارىيى»دا بوخ، تۆمۈر داۋامەت، ئىسمائىل ئەھمەد، ئاپېي ئاۋاڭجىنمېي قاتارلىق رەھبەرلەر بىلەن كۆرۈشتى. جۇڭگو يازغۇچىلار جەمئىيىتىنىڭ قىزغىن كۈتۈۋېلىشىغا ئېرىشتى.
  ★ 1998 - يىلى 1 – ئاي  قازاقچە ژۇرنالنىڭ تارقىلىشى 6 مىڭدىن ئېشىپ، شىنجاڭدىكى قازاقچە ژۇرناللار ئىچىدە ئالدىدا تۇردى.
  ★ 1998 - يىلى 12 - ئاي ئۇيغۇرچە ژۇرنالنىڭ تىراژى 88 مىڭغا يەتتى. بۇ، دۆلەت ئىچىدىكى ئۇيغۇرچە ژۇرناللارنىڭ ئەڭ يۇقىرى تىراژى بولۇپ قالدى.
  ★ 2000 - يىل 1 – ئاي  ئۇيغۇرچە ژۇرنال  1998 ــــ 1999 – يىل مەملىكەت بويىچە 1- قېتىملىق قەرەللىك ژۇرنال مۇكاپاتىغا تاللاندى.
  ★2000 - يىل 3 – ئاي  ئۇيغۇرچە ژۇرنال «مىللەت ساپاسى ھەققىدە سۆھبەت» سەھىپىسى تەسىس قىلىپ، مەركىزىي خەلق رادىيو ئىستانسىسى بىلەن بىر يىل ھەمكارلىق ئورناتتى. ئۈرۈمچىدە يىغىن ئېچىپ،  11 پارچە مۇنەۋۋەر ئەسەرنى مۇكاپاتلىدى.
  ★2000 - يىل 6 - ئاينىڭ 30 – كۈنى  ئىدارىمىزنىڭ ئېنتېرنېت تورى WWW.56-CHINA.COM.CN   ئېچىلدى.
  ★ 2000 - يىلى 9 - ئاينىڭ 28 - كۈنى   دۆلەتلىك مىللەتلەر ئىشلىرى كومىتېتى پارتگۇرۇپپىسىنىڭ شۇجىسى، مۇدىر لى دېجۇ يىغىنغا رىياسەتچىلىك قىلىپ، «مىللەتلەر ئىتتىپاقى» ژۇرناللىرىنىڭ نامىنى 2001 - يىل 1 - ئايدىن باشلاپ «جۇڭگو مىللەتلىرى» دەپ ئۆزگەرتىشنى مۇزاكىرە قىلدى.
  ★ 2000 -يىلى ژۇرنىلىمىز تەھرىراتى شىنجاڭ «خانتەڭرى ئەدەبىيات مۇكاپاتى»غا ئەزا ژۇرناللار قاتارىغا كىردى. شۇ يىلى 9 - ئايدا قەشقەردە ئېچىلغان 10 - نۆۋەتلىك «شىنجاڭ خانتەڭرى ئەدەبىيات مۇكاپاتى» تارقىتىش يىغىنى ۋە 6- قېتىملىق يېڭى دەۋر ئۇيغۇر ئەدەبىياتى مۇھاكىمە يىغىنىدا، ژۇرنىلىمىزدا ئېلان قىلىنغان ئىككى پارچە ئەسەر يەنى، ئابلاجان مۇھەممەد بوۋاقىنىڭ «مىللىتىم» ناملىق شېئىرى (1999- يىللىق 4- ساندا ئېلان قىلىنغان) بىلەن ئىبراھىم ئالىپ تېكىننىڭ «ئاتا ــــ بىر تۈپ سۆيگۈ دەرىخى» (2000 - يىللىق 1- ساندا ئېلان قىلىنغان) ناملىق نەسرى 10- نۆۋەتلىك «خانتەڭرى ئەدەبىيات مۇكاپاتى»غا ئېرىشتى.
  ★ 2000 - يىل 11 - ئاينىڭ 28 - كۈنى  دۆلەتلىك ئاخبارات – نەشرىيات باش مەھكىمىسى 2000 - يىل 1605 - نومۇرلۇق  ھۆججەت چىقىرىپ، خەنزۇ، موڭغۇل، ئۇيغۇر، قازاق، چاۋشيەن تىل- يېزىقلىرىدىكى «مىللەتلەر ئىتتىپاقى» ژۇرناللىرىنىڭ نامىنى «جۇڭگو مىللەتلىرى»گە ئۆزگەرتكەنلىكىنى ئېلان قىلدى.
  ★ 2000 - يىل 11 - ئايدا ئىدرىس بارات، خەمىت نېغمەت، ئەركىن ئەبەيدۇللالار تەييارلىغان نادىر ئەسەرلەر توپلىمى ـــــ «21- ئەسىر سوۋغىسى ــــ  جەزبدار گۈلدەستىلەر» (2) ناملىق كىتاب نەشر قىلىنىپ تارقىتىلدى.
  ★ 2001 - يىل 1 - ئايدىن باشلاپ، بەش خىل تىل- يېزىقتىكى ژۇرنالنىڭ نامى بىردەك «جۇڭگو مىللەتلىرى»گە  ئۆزگەرتىلدى. ژۇرنالنىڭ باش مەقسىدى، قەرەلى، فورماتى، تارقىتىلىش دائىرىسى ئۆزگەرمىدى.
  ★2001 - يىل 8- ئاي  نامى ئۆزگەرتىلگەندىن كېيىنكى  ئۇيغۇرچە «جۇڭگو مىللەتلىرى» ژۇرنىلى مۇقاۋا 4 - بېتىدە شىنجاڭدىكى ئاتاقلىق شائىرلارنىڭ شېئىرلىرىنى سۈرەت بىلەن كىرىشتۈرۈپ بېرىشنى يولغا قويۇپ، ئوقۇرمەنلەرنىڭ يۇقىرى باھاسىغا ئېرىشتى. شۇ يىلى روزى سايىتنىڭ «ئۇيغۇر گىلىمى» ناملىق شېئىرى 11 - نۆۋەتلىك شىنجاڭ «خانتەڭرى ئەدەبىيات مۇكاپاتى»غا ئېرىشتى.
  ★ 2003 - يىل 6 - ئايدا ئىدارىمىز مۇئاۋىن باش مۇھەررىرى، شىنجاڭ شۆبە ئىدارە مۇدىرى ئىدرىس بارات ۋە ليۇ زېڭلىن دۆلەتلىك مىللەتلەر ئىشلىرى كومىتېتىغا بىۋاسىتە قاراشلىق ئىدارە- ئورگانلار پارتكومى تەرىپىدىن «سارىسنىڭ ئالدىنى ئېلىش- مۇداپىئە كۆرۈش خىزمىتىدىكى مۇنەۋۋەر كوممۇنىست» بولۇپ تەقدىرلەندى.
  ★2003 - يىل 9 - ئايدا باش ئىدارىمىز چاقىرغان «مەملىكەت بويىچە جۇڭگو مىللەتلىرى ژۇرناللىرىنى تارقىتىش – تەشۋىق قىلىش خىزمەت يىغىنى» ئۈرۈمچىدە ئېچىلدى.
  ★ 2003 - يىلى 10 – ئاي  ئۇيغۇرچە ژۇرنال نەشر قىلىنغانلىقىنىڭ 15 يىللىقىنى خاتىرىلەش مۇناسىۋىتى بىلەن تۈزۈلگەن تاللانما ئەسەرلەر توپلىمى ـــــ «جەزبدار گۈلدەستىلەر» (3) ناملىق كىتاب قەشقەر ئۇيغۇر نەشرىياتى تەرىپىدىن نەشر قىلىندى.
  ★ 2003 - يىلى 10 – ئاي يازغۇچى ئەخمەت ئىمىننىڭ «جۇڭگو مىللەتلىرى» ژۇرنىلىنىڭ 2002 - يىللىق 3 - سانىدا ئېلان قىلىنغان «ئايال» ناملىق نەسرى 12 - نۆۋەتلىك شىنجاڭ «خانتەڭرى ئەدەبىيات مۇكاپاتى»غا ئېرىشتى.
  ★ 2004 - يىلى 4 - ئاي. ئىدرىس باراتنىڭ «خەير - خوش 20 - ئەسىر، مەرھابا 21 - ئەسىر» ناملىق ئەسىرى دۆلەتلىك مىللەتلەر ئىشلىرى كومىتېتى تەرىپىدىن «4- نۆۋەتلىك مىللەتلەرگە ئائىت ياخشى خەۋەرلەر»نى باھالاشتا 2- دەرىجىلىك مۇكاپاتقا ئېرىشتى.
  ★ 2004 – يىلى 7 - ئايدا «سەلتەنەت» تور بېكىتى يېڭىدىن تەسىس قىلىندى. 9- ئايدا، «جۇڭگو مىللەتلىرى» ژۇرنىلىدا ئېلان قىلىنغان نادىر ماقالە – ئەسەرلەرنىڭ قىسقىچە مەزمۇنلىرى ۋە ئالاقىدار ئۇچۇرلار «سەلتەنەت» تورى ئارقىلىق تارقىتىلدى. بۇ، خەلقئارا  ئىنتېرنېت تورىدا ئۇيغۇرچە ژۇرنال بولماسلىقتەك بوشلۇقنى تولدۇردى.
  «سەلتەنەت» تور بېكىتى يەنە ماقالە - ئەسەر قوبۇل قىلىش سېستېمىسىنى ئېچىپ، يىراق - يېقىندىكى ئاپتورلارنىڭ تور ئارقىلىق ئەسەر يوللىشىنى ئىشقا ئاشۇردى. 
  ★«جۇڭگو مىللەتلىرى »ژۇرنىلى 2004 - يىللىق 5 - ساندىن باشلاپ خەلقئارا ئۆلچەملىك چوڭ 16 فورماتقا ئۆزگەرتىلدى.  ئەسلىدىكى  64 بەتكە يېڭىدىن 8 بەت قوشۇلۇپ ، ئىچ بەت 72 بەتلىك ( مۇقاۋىسى بىلەن 76 بەت) ژۇرنال قىلىپ چىقىرىلدى.
  ★ 2004 - يىلى 9 - ئاينىڭ 28 – كۈنى ، مىللەتلەر ئىتتىپاقى ژۇرناللىرى نەشرىياتى شىنجاڭ شۆبە ئىدارىسى 13 - نۆۋەتلىك شىنجاڭ «خانتەڭرى ئەدەبىيات مۇكاپاتى» ۋە «مىللەتلەر ئىتتىپاقلىشىپ ئىلگىرىلەش، ئورتاق گۈللىنىپ تەرەققىي قىلىش مۇھاكىمە يىغىنى»نى كۇئېنلۇن مېھمانخانىسىدا مۇۋەپپەقىيەتلىك، داغدۇغىلىق ئۆتكۈزدى. رەئىس ئىسمائىل تىلىۋالدى يىغىنغا قاتناشتى ۋە سۆز قىلدى.  يىغىندا، ئىدرىس باراتنىڭ «خەير - خوش 20 - ئەسىر، مەرھابا 21 - ئەسىر» ناملىق ماقالىسى، تۇرغۇن يىلتىزنىڭ «ئۇيغۇر دوپپىسى» ناملىق غەزىلى، قاۋۇل ساۋۇرنىڭ «قالىدۇ» ناملىق شېئىرى، ئۆمەرجان سىدىقنىڭ «ئابدۇخالىق ئۇيغۇر ۋە ئۈچ ئەڭگۈشتەر» ناملىق ماقالىسى ئايرىم - ئايرىم ھالدا 13- نۆۋەتلىك شىنجاڭ «خانتەڭرى ئەدەبىيات مۇكاپاتى»غا ئېرىشتى.
  ★ 2004 - يىل 11 - ئاي  «جۇڭگو مىللەتلىرى»نىڭ خەنزۇ، موڭغۇل، ئۇيغۇر، قازاق، چاۋشيەن، ئىنگلىز تىل - يېزىقلىرىدىكى نۇسخىلىرى جۇڭگو ھەربىي ئىشلار مۇزېيى ئۆتكۈزگەن يېڭى جۇڭگو قۇرۇلغاندىن بۇيانقى تۇنجى نۆۋەتلىك «جۇڭگو تەرجىمە مۇۋەپپەقىيەتلىرى كۆرگەزمىسى»گە قاتناشتۇرۇلدى.
  مەركىزىي كومىتېت سىياسىي بىيۇرۇسىنىڭ ئەزاسى، شۇجىچۇنىڭ شۇجىسى، مەركىزىي تەشۋىقات بۆلۈمنىڭ باشلىقى ليۇ يۈنشەن «جۇڭگو مىللەتلىرى» ژۇرناللىرىنى كۆرۈۋېتىپ مۇنداق دېدى: « ‹جۇڭگو مىللەتلىرى› دېگەن ئەسلىدىكى ‹مىللەتلەر ئىتتىپاقى› دېگەن ژۇرنالغۇ، ژۇرنىلىڭلار ماڭا بەكمۇ تونۇشلۇق، مەن سىلەرنىڭ كونا ئوقۇرمەنىڭلار بولىمەن. سىلەر بۇ ژۇرنالنى ئوخشاش بولمىغان ئوبيېكىتلارغا قارىتىپ ئالتە خىل تىل - يېزىقتا نەشر قىلىپ تارقىتىپ ناھايىتى ياخشى قىپسىلەر، ئۆزگىچە ئالاھىدىلىكى بار ئىكەن، ئىلگىرىكىگە قارىغاندا ناھايىتى زور دەرىجىدە  ياخشىلاپسىلەر، سىلەر مەملىكەت ئىچى - سىرتىغا قارىتىلغان تەشۋىقاتتا ئۆزگىچە ئۈستۈنلۈككە ئىگە». 
  ★ 2005- يىل 1- ئاي. «جۇڭگو مىللەتلىرى»نىڭ  ئۇيغۇرچە نۇسخىسى ئۇدا ئۈچ نۆۋەت دۆلەت قەرەللىك ژۇرناللارنى باھالاش پائالىيىتىدە مۇكاپاتلاندى، 3 - قېتىمدا «دۆلەت ژۇرنال مۇكاپاتىنىڭ نام - ئاتاق مۇكاپاتى»غا ئېرىشتى. بۇ، پۈتۈن مەملىكەت بويىچە ئۇيغۇرچە ژۇرناللار ئىچىدە بىردىنبىر مۇكاپات بولدى.
  ★2005 - يىل 6 - ئاي . شىنجاڭ شۆبە ئىدارە پارتىيە ياچېيكىسى ۋە پېشقەدەم كادىرلار پارتىيە ياچېكىسى دۆلەتلىك مىللەتلەر ئىشلىرى كومىتېتىغا بىۋاسىتە قاراشلىق ئىدارە- ئورگانلار پارتكومى تەرىپىدىن «ئىلغار ئاساسىي قاتلام پارتىيە تەشكىلاتى» بولۇپ باھالاندى.
  ★  2005 - يىل 10 - ئاي يازغۇچى تۇراپ ئوبۇلنىڭ « تەئەججۈپلىك خىياللار» ناملىق نەسرى ۋە ئابدۇغېنى قۇرباننىيازنىڭ «نان قېپى» ناملىق ئەسىرى 14 - نۆۋەتلىك  شىنجاڭ «خانتەڭرى ئەدەبىيات مۇكاپاتى»غا ئېرىشتى.
  ★ 2005 - يىل 11 - ئاي ئۇيغۇرچە ژۇرنالدا «ئوقۇرمەنلەرنىڭ ژۇرنالنى باھالاش مۇكاپاتلىق سوئال - جاۋاب پائالىيىتى» يولغا قويۇلدى. ئىستاتىستىكىدا ئوقۇرمەنلەرنىڭ ژۇرنالدىن رازى بولۇش نىسبىتىنىڭ 90 پىرسەنتتىن يۇقىرى  ئىكەنلىكى مەلۇم بولدى.
  ★ 2006 - يىل 4 - ئاي «جۇڭگو مىللەتلىرى» ژۇرنىلىنىڭ ئېلېكتىرونلۇق ئوپتىك دېسكا نۇسخىسى مۇۋەپپەقىيەتلىك ئىشلەندى. بۇ ھال دۆلىتىمىزدە ئۇيغۇر تىلىدىكى ئېلېكترونلۇق ژۇرنال بولماسلىق بولشلۇقىنى تولدۇردى. ئالاقىدار مەتبۇئات، رادىيو - تېلېۋېزىيەلەر بۇ ھەقتە مەخسۇس خەۋەر تارقاتتى.  
  ★ 2006 - يىل 5 - ئاينىڭ  18- كۈنى دۆلەتلىك مىللەتلەر ئىشلىرى كومىتېتى 2006 - يىل 45 – نومۇرلۇق ھۆججەت چىقىرىپ، تۇرۇپ باراتنى مىللەتلەر ئىتتىپاقى ژۇرناللىرى نەشرىياتىنىڭ دائىمىي مۇئاۋىن باشلىقلىقىغا تەيىنلىدى (مەھكىمە- نازارەت دەرىجىلىك).  
  ★ 2006 - يىل 7- ئاي  ئۇيغۇرچە ژۇرنال «ئەسەرلەر سالونى» تور ژۇرنىلىنى ئىنتېرنېتقا چىقاردى. بۇ سالۇنغا تور ئارقىلىق كەلگەن ئەسەرلەر دەسلەپكى تەھرىرلىك، تەكشۈرۈشلەردىن ئۆتكەندىن كېيىن ئاندىن ئېلان قىلىندى. بۇنىڭ بىلەن «جۇڭگو مىللەتلىرى» ژۇرنىلى ئۇيغۇرچە نەشرىدە تۆت خىل ژۇرنال نۇسخىسى يەنى، يېزىقچە نۇسخىسى، تور نۇسخىسى، ئوپتىك دېسكا نۇسخىسى، ئەسەرلەر سالونىدىن ئىبارەت تۆت خىل ژۇرنال نۇسخىسى بار بولدى. 
  ★ 2006 - يىل 11 - ئاي يازغۇچى ئەختەم ئۆمەرنىڭ «بىزدىكى ئىسراپچىلىقلار» ناملىق يۈرۈشلۈك ماقالىسى ۋە ئەكرەم ئابدۇمىجىتنىڭ «ئۇيغۇر ئالىملىرى» ناملىق شېئىرى ئايرىم - ئايرىم ھالدا - نۆۋەتلىك شىنجاڭ «خانتەڭرى ئەدەبىيات مۇكاپاتى»غا ئېرىشتى.
  ★ 2007 - يىل 3 - ئاينىڭ 29 - كۈنى مەملىكەتلىك خەلق قۇرۇلتىيى دائىمىي كومىتېتىنىڭ سابىق مۇئاۋىن باشلىقى تۆمۈر داۋامەت  خەنزۇچە «جۇڭگو مىللەتلىرى» ژۇرنىلى نەشر قىلىنغانلىقىنىڭ 50 يىللىقىنى تەبرىكلەش مۇناسىۋىتى بىلەن بېغىشلىما يېزىپ بەردى. 
  ★ 2007 - يىل 3 - ئاينىڭ 30 - كۈنى مەملىكەتلىك خەلق قۇرۇلتىيى دائىمىي كومىتېتىنىڭ سابىق مۇئاۋىن باشلىقى ئىسمائىل ئەھمەد  خەنزۇچە «جۇڭگو مىللەتلىرى» ژۇرنىلى نەشر قىلىنغانلىقىنىڭ 50 يىللىقىنى تەبرىكلەش مۇناسىۋىتى بىلەن بېغىشلىما يېزىپ بەردى.
  ★ 2007 - يىل 5 - ئاينىڭ 10- كۈنى مەملىكەتلىك سىياسىي كېڭەشنىڭ مۇئاۋىن رەئسى ئابلەت ئابدۇرېشىت خەنزۇچە «جۇڭگو مىللەتلىرى» ژۇرنىلى نەشر قىلىنغانلىقىنىڭ 50 يىللىقىنى تەبرىكلەش مۇناسىۋىتى بىلەن بېغىشلىما يېزىپ بەردى.
  ★ 2007 - يىل 8 - ئاي شىنجاڭ ئۇيغۇر ئاپتونوم رايونىنىڭ رەئسى ئىسمائىل تىلىۋالدى  خەنزۇچە «جۇڭگو مىللەتلىرى» ژۇرنىلى نەشر قىلىنغانلىقىنىڭ 50 يىللىقىنى تەبرىكلەش مۇناسىۋىتى بىلەن بېغىشلىما يېزىپ بەردى.
                                (داۋامى بار)